السلام عليكم ورحمة الله وبركاته
عمتِم مساءًا جميعاً
.
.
هالبوست بيكون عن مجموعة little love potions من بينفت
هالمجموعة كانت خاصّة لأفضل 10 منتجات مبيعاً ، فجموعها وعرضوها كمجموعة خاصة بالكريسماس فقط !
تحمست آخذها لأن مثل ماقلت تحتوي على 10 منتجات وعلى الرغم إن فيه 2 منهم سبق وجربتهم
في مجموعة Primping With The Stars اللي سبق وتكلمت عنهم [ هنا ]
المنتجات هي :
1- Hoola lip gloss
2- that gal primmer
3- The professional
4- It's Potent "eye cream
5- watt's up highlighter
6- Bad Gal mascara
7- poise tent
8- stay don't stray
9- high beam
10- hoola bronzer
نبدأ نتكلم عن المنتجات الموجودة
من اليمين لليسار :
1- Holla gloss :
[ مُلمّع شفاه ] بلون لحمي تقريباً يعني لونه مو باين كثير، حبيت إن لمعانه
مو مرة قوي ومايدبق وهذي أهم نقطة $_$
ما أقدر أقول عنه أكثر لأن مو مرة أحب القلوسات يعني إستخدامي لها نادر ومن شريته ما آستخدمته إلا مرة فقط
هذا سواتش له [ هنا ]
2- The professional البرايمر الأشهر على الإطلاق XD
سبق وتكلمت عنه [ هِنا ]
3-That gal برايمر بإضاءة ، يستخدم قبل المكياج أو لحاله لأنه يرطب الوجه
ويعطيه رونق وردي .
المدح عليه كثير ولولا إني ماحصلته في هالمجموعة كنت راح أشتري الحجم الأصلي منه
بس للأمانة أحس لسا ما أعطيته الفترة الكافية عشان أحكم عليه وما أستخدمته إلا مرة وماحسيته
وآو أو حتى قد المدح ! يعني حسيته كان عادي جداً زي أي برايمر ... لكن لسا ما يأست منه
وبرجع أجربه زين إن شاءالله بس لين تخف بشرتي لأني حالياً أحاول أخفف مستحضرات تجميل
عليها ="(
على العموم هذا سواتش له [ هِنا ]
4- It's Potent
كريم للعيون للعناية بهالمنطقة ويخفف من الهالات السوداء
قوامه مو كريمي أبد ولا يترك أثر زيتي نهائياً ، أنا عجبني إنه للعناية بما حول العيون
عاد أنا ما أستغني عن كريمات العين أبد خصوصاً إني أحط كحل وماسكرا بشكل شبه يومي ومع المسح
لما أزيل المكياج المنطقة تضرر ولأنها رقيقة جداً فهي معرضة للتجاعيد بشكل أسرع لذلك لازم أرطب المنطقة
بمرطب خفيف ومناسب
وبالنسبة لمرطب بنفت أحسه عادي يعني تستخدمينه هو أو غيره ماراح تفرق
أو بمعنى أصح مافيه ميزة خاصة !
أو من ناحية الهالات السوداء أنا ما أعاني من المشكلة وإن طلعت فهي بسبب قلة النوم وبمجرد ما أعدله
تروح ويرجع الوضع طبيعي ما أحتاج كريم تفتيح ولا غيره
يعني ما أقدر أحكم ع مدى فعالية هالكريم ناحية الهالات للأسف =$
5- watt's up
أصبع إضاءة قوامه كريمي خفيف جداً مو ثقيل واللون برضوا مو لامع بشكل قوي ، بالعس لمعته طبيعية وهادية
واللون جميل جداً يناسب جميع ألوان البشرة لأنه مو مرة مايل للذهبي
برضوا كونه ستيك عجبني كثير خصوصاً إن الستيك نفسه صغيرمو كبير يحوس الدنيا لما أستخدمه
ممكن تستخدمينه مباشرة ع بشرتك أو تاخذين كمية منه بفرشاه عشان تتحكمين بحجم الكمية
وهِنا سواتش له
حبيته كثير وأعتمدته إضائتي الرئيسية خلاص وطبعاً راح أشتري منه ثاني إن شاءالله =$
6- ماسكرا Bad Gal
الماسكرا جميلة جداً تكثف بشكل حلو متوسط وماتكتل وهذا الأهم ، خفيفة على العين وماتحسس
أو تتعب في الإزالة عكس they'r real !
لكن نتيجتها أيضاً ممكن نلقاها بأي ماسكرا ثانية بس فيه شيء ميّزها وهو إني
لما أغسل وجهي أحياناً وقت وضوء أو شيء ماتسيل وتخليني زومبي
يعني وقت الصلوات لما أكون طالعة لأحد أستخدم أستخدمها وبس وما آضطر أستخدم ماسكرات ضد
الماء واللي نهائياً ماأحهبم ، وهذي الميزة اللي حبيتها فيها إنها ماتسيل وبنفس الوقت مو ضد الماء
وأكيد بشتريها مرة ثانية إن شاالله
7- برونزر Hoola :
برونز ناعم بدون لمعة بأندرتون رمادي مو أورانج ولا ذهبي زي معظم البرونزرز
بصراحة مدري وشلون أحكم عليه لأن للأسف لونه جاي مثل لوني تقريباً أو أغمق منه بشيء بسيط
لا يُلاحظ يعني ما أعطاني تغيير أو نتجية في اللون وكأني حاطة بودرة عادية لا أكثر !
هذا غير إني أفضل اللي يجي بسحنة ذهبية يعني Hoola ماناسبني أبداً والحمدلله ماكنت متحمسة له
وأحسه بيناسب صاحبات البشرة الفاتحة وبينفع لهم كـ كونتور بعد .
آخر 3 منتجات وهم من اليمين لليسار :
8- برايمر العين Stay Don't stray سبق وتكلمت عنه هِنا
9- poise tent :
تينت للشفايف بلون وردي لطيف وقوام لزج نوعاً ما
حبيته كثير خصوصاً إنه يعطي لون طبيعي مرة وتغطيته أحسن من بين تنت الأحمر بمراحل
وبرضوا مافيه ريحة ماء الورد المزعجة ، هِنا سواتش له .
عجبني جداً وحسيته التينت اللي كنت أدور عنه من زمان وإن شاءالله بشتري منه في المستقبل 3>
10 - highbeam :
إضاءة بلون لؤلؤي قوي تناسب الفاتحات أكثر
ماحبيتها كثير للأمانة ..أولاً لونها قوي وثانياً درجتها ماعجبتني وما أحسها تناسبني
هِنا سواتش لها
وفقط هذي المنتجات اللي كانت موجودة ، وسعرها كان بحوالي 200 ريال تقريباً يعني توفير بدرجة كبير
و حبيت إنها كانت منوعة وأعطاني هالشيء مجال أجرب منتجات أكثر كنت مفكرة أشتريها ..
بس للأمانة التعليب ماعجبني :
زي ما أنتم شايفين العلبة الخارجية كرتونية والداخلية بلاستيكية
مو سيء لكن بينفت يسوون أفضل من كذا بكثير !
ومثل ماقلت هالمجموعة كانت مؤقتة لكن المنتجات طبعاً متوفرة كل واحد لحاله
هذا لبوست اليوم ، إن شاءالله كان ممتع
يسعدني لو أنتظرتوا البوست الجاي واللي جتني فكرته
لما شفت كمية الأسئلة اللي تنكب على البلوقرز في حساب الآسك p;
في حفظ الرحمن $
- - - - - - - - - - - - - - - - - - - - - - - - -
بالإمكان متابعة المدونة على التويتر :
@Estrella_blog
والإنستقرام أستخدم نفس اليوزرنيم أيضاً
@estrella_blog
ليست هناك تعليقات:
إرسال تعليق