كل مشكلة ولها حلّ | أغذية لإعادة الشعر للحياة [جزء3 ]

السلام عليكم ورحمة الله

طابّ يوم الجميع 

وإن شاءالله كلكم بصحة وعافية وسعادة 

بوست اليوم هو آخر بوست من سلسلة عنايتي بشعري [ الجزء الأول هِنا و الثاني هِنا ]

وبيكون مخصص للتغذية ، إيش الفيتامينات اللي آستخدمتها والأصناف حرصت أكثّر منها في غذائي

طبعاً جزء التغذية وبرأيي هو الأساس لأن عشان نصلح الخارج لازم نصلح الداخل 

لذلك حتى مع العناية الخارجية لازم تتغذين كويس وتعالجين نقص الفيتامينات أو الحديد 

عشان تكونين شملتي إهتمامك بشعرك من جميع النواحي !

وإلاهتمام الداخلي لشعرك يشمل نوعين :

1- غذاء طبيعي 

2- مكملات صناعية 

الغذاء الطبيعي آمن أكثر وسهل وغالبية الأصناف اللي كويسة للشعر مقبولة عند الكل

 بينما المُكملات مو على أية حال تناسب بس إحنا للأسف نشتري من الصيدلية ونستعملها

بدون تحليل مُسبق أو متابعة طبية =/

للأسف أنا كنت كذا متى ماحسيت شعري بدا يضعف ع طول آخذ فيتامينات من الصيدلية وآستخدمها

ياتصيب وياتخيب ودايم أردد إنها فيتامينات إن مانفعت ماراح تضر ... وهذا أكبر خطأ

لأن ضعف الشعر له أسباب عديدة ممكن نقص فيتامين معين لازم تسوين تحليل عشان تعرفين إيش

بس إحنا ناخذ فيتامينات بشكل عشوائي ممكن بعضها جسمنا مو ناقصها فبكذا تفيض عن حاجة الجسم

وتسبب مشاكل !

وأيضاً أحياناً يكون الضعف بسبب نقص الحديد مو فيتامين . أنا كنت لما أحس بأعراض فقر الدم 

كنت على طول أستخدم حبوب حديد لزيادته وما كنت أعرف إنه لما مستوى الحديد لما يزيد برضوا 

راح يسبب مشاكل

 بالإضافة إنه مكملات الفيتامينات والحديد لها فترة معينة نستخدمها يعني

ننتبه  ما نستخدمها لوقت طويل ! بالكثير ماتتجاوز الثلاثة شهور وياحبذا أقلّ

ومو شرط نستخدمها لحدّ مانشوف نتائج أو نخلص علبتين منها ع أساس كذا يعطينا نتائج أفضل !

وهنا يجي الفرق بين المكملات الصناعية والطبيعية ، وهي إن الجسم مع المكملات الطبيعية

يمتص حاجته منها ويتخلص من الفائض بسهولة عكس الصناعية 

زبدة الكلام بإختصار : حاسة شعرك يتساقط بزيادة روحي للطبي أطلبي تحليل 

ومنها هو بيعطيك المناسب ، وإذا ماقدرتي الحلّ متوفر عندك في بيتكم وبذكر الأكثر 

فائدة منها للشعر في هالموضوع ..

^

ممكن كثير منكم يعرفون هالكلام بس مايمنع نعطي خبر اللي ماتدري =$

طبعاً من ناحية الأغذية أكيد ضروري نحرص على الأكل الصحي بشكل عام

وماراح أتكلم عن الأصناف المعروفة للشعر بس راح أذكر إللي أنا ركزت عليه 

وحسيت فعلاً بتغيير :

1- التمر 

أو كما يسمونه " منجم الفيتامينات "  أتوقع الجميع يعرف تماماً فوائد التمر فمايحتاج أدخل فيها =$

التمر أنا آكله وما أقطعه بس مو يومياً وإذا أكلت آكتفي بحبتين أو 3 !

بس لما بغيته يحسن شعري صرت آكل عدد أكبر في اليوم والتمر كثرته ماتضر إن شاءالله

والحمدلله معاه خف تساقط شعري شيء بسيط

إذا كنتِ تبين تاكلينه كوجبة كاملة آشربي معاه حليب بكذا تكونين آختصرتي فوائد وجبة كاملة بهالصنفين

2- الخضار الورقية 

الخضار الورقية الداكنة تحديداً مثل الجرجير والخس والسبانخ والملوخية

مليانة فوائد للشعر والسبانخ بالأخص مليانه بالـ بيوتين وهو مادة كويسة ومهمة لصحة الشعر

والخضار الورقية عموماً ماتحتاج جهد في الطبخ بإمكانك تقطعينها مع السلطة أو تقطعينها سوا

مع جبنة فيتا وخل وليمون وبتطلع لذيذة كسناك 

والكلام عن فوائدها للشعر وللجسم كَـكل مافيه أي مبالغة وبمجرد ماتجربين راح تلاحظين 

3- الكبدة

اللي بتقول ما أحب الكبدة فأنا أقولك إنك لسا ماجربتي الوصفة المناسبة =$

لأن طريقة تحضير الكبد تأثر بشكل كبير ع الطعم ، شخصياً مو أي كبدة آكلها 

لأن نفسي شينة بصراحة وأتحسس من أي نكهة طاغية للحم بس لما أحد يسوي كبدة 

مطبوخة كويس آكلها وأحياناً أرغم نفسي آكل كمية أكثر منها لأنها مفيدة بشكل ماتتصورونه

بالذات للي فيهم فقر دم ! وهذي طريقة تحضير للي ماعندها خلفية عن تحضير الكبدة وحابة تجربها:

طريقة تحضير سهلة وسريعة للكبدة ولذيذة :

1- بصل مكعبات صغيرة بس مو مرة صغيرة يعني حجم عادي

2- كبدة

3- بهار 

4- خل وليمون

آحمسي البصل كويس بعدين حطي عليه الكبدة وقلبيها دقيقتين أو لين يخف إحمرارها بس لاتتطولين كثير

عشان ما تقسى ، طفي ع النار وعلى طول حطي عليها البهار وكثري منها بالذات الفلفل الأسود وبعدها

حطي عليها الليمون والخل وقلبيها وتناوليها ساخنة ، بالعافية 

4- عصير الزبيب اليماني أو الأسود

لحظة قبل لا تقولون وع زبيب ترى الزبيب هذا يختلف عن الأصفر اللي يحطونه مع الأكل

ومن يصير بالصدفة في لقمتنا ننهار كأننا أكلنا سمّ هههههه

وعصير الزبيب الأسود طعمه لا يُمت لطعم الزبيب الأصفر بصلة إطلاقاً 

ماتعرفون قد إيش مفيد بالذات للي يعانون من فقر الدم !

حتى دكتورة قالت لأمي إنه لو يومياً نشرب ملىء الفنجان الصغير عصير زبيب لمدة أسبوع فقط 

راح يرتفع مستوى الحديد في دمك بشكل ملحوظ ويوصل للمعدل الطبيعي 

هذا غير إنه يحتوي على فيتامين [ ب ] المهم لجمال الشعر والبشرة 

أنا قبل كم سنة آستمريت عليه ولاحظت تحسن في شعري و بشرتي وصحتي الحمدلله

وألحين أحاول أرجع أنتظم عليه T^T

عموماً طريقة العصير سهلة جداً وهذي هي:

طريقة تحضير عصير الزبيب :

 المطلوب تجيبين زبيب أسود من أي عطار موثوق 

وتاخذين منه قبضة يدك وتغسلينه زيين وتنظفينه من الغبار والعوالق بعدها آنقعيه

فيه ماء شرب حار وخليه ساعتين - ضروري مايتجاوز ساعتين أو 3 عشان مايصير كارثة XD -

بعدها حطيه بالخلاط مع مويته وآخلطيه كويس لين ينطحن

البذر اللي جوا - لازم تستخدمين خلاط كويس وحادّ الشفرات -

وخلاص بعدها بإمكانك تشربينه مايحتاج تضيفين سكر أو مُحلي لأن طعمه حالي جداً

وبالإمكان تضيفين عليه إللي تبين أنا أضيف عصير برتقال لأنه يساعد ع آمتصاص الحديد

وأحياناً موز والبعض يحب يضيف الحليب بس لازلت أشوف البرتقال أفضل شيء ممكن نضيفه

تنبيه : الزبيب يحتوي ع سعرات كثيرة مرة وصحيح إن العنب سعراته بسيطة
لكن لما يتحول لـ زبيب فالسعرات تتضاعف لذلك إن كنتِ مهتمة بوزنك لاتحرمين نفسك
لأن بإمكانك تاخذينه كوجبة وتنتبهين لبقية السعرات في بقية وجباتك
في النهاية الصحّة تأتي قبل الوزن =]

فقط هذي الأصناف الثلاثة اللي فعلاً داومت عليها وجابت لي نتيجة فعشان كذا ركزت لها من واقع التجربة
وطبعاً وفيه أصناف كثير للطعام تعتبر ثروة للشعر بس ماجربتها مثل الأوفوكادو أو كما يسمونه فاكهة الجمال

يؤكل ويستخدم كـ ماسك ومفعولة كما يُقال مُبهر جداً للشعر بس للأسف لسا ماتفرغت له

وأيضاً المكسرات فيها فيتامينات مهمة لجمال وصحة الشعر والبشرة وحتى للقلب 

بإمكانك تاكلينها كـ سناك يومي بس أحرصي تكون مسكرات مشكلة غير مملحة وغير محمصة

أيضاً سمك السلمون جميل ولذيذ بشكل ! ومرة حلو للشعر لأنه مصدر طبيعي 

للأوميغا3 حبيب الشعر 

ومو شرط تحبين السمك عشان تاكلينه لأن طعمه شوي مختلف وأشهى وألذ وفيه وصفات

تحليه كثير مثل " سمك السلمون بالكريمة" آبحثوا عنها بقوقل وبتعجبكم إن شاء الله

للأسف ماجربت هالوصفة بس كثير يمدحونها فعشان كذا قلت لكم عنها

،

أما بالنسبة للمكملات الصناعية فجميع اللي آستخدمته معروف وما يحتاج أفصّل فيها 

وكانت 3 مكملات هي :

الأول :كان هير دال كان كويس بس كثّر شعر جسمي 

الثاني : مكمل الزنك  كان غباء مني أستخدمه بدون مشورة طبية لأن عنصر الزنك يزيد نسبة هرمون الذكورة 

في الجسم  لذلك البعض لما يستخدمه يطول ويزيد شعر جسمه أنا جربته وماسوى لشعري شيء بس فعلاً

زاد طولي !

الثالث : كبسولات زيت كبد الحوت مالاحظت شيء تغير بس آظافر صارت أقوى وتطول أسرع فقط .

بس مثل ماقلت لا تاخذونه إلا وأنتم متأكدين ومسوين تحليل قبل 

+ ممارسة الرياضة ممتازة للشعر لأن مع الحركة الدورة الدموية تتنشط في الجسم
وتوصل بتدفق لكل مكان ومن ضمنها فروة الرأس =]

هذي نهاية الموضوع وأنتظروا البوست الجاي اللي راح يكون عن مجموعة بينفت:

little love potions




وأي آستفسار بالإمكان وضعه هنا أو على حسابي في التويتر

هنا :

@Estrella_blog

والإنستقرام أستخدم نفس اليوزرنيم أيضاً 
@estrella_blog

وطآب يومُكم ( )